Ua faailoa nei e le Malo o Ausetalia le amata o lana polokalame nofomau fou mo tagata o le Pasefika i le aso 3 o le masina o Iuni, peitai ua lē aofia ai ma Samoa.

Ua na o atunuu e pei o le FSM poo le Federated States of Micronesia, Fiti, Nauru, Palau, Papua Niu Kini, Solomona, Timor Leste, Tonga, Tuvalu ma Vanuatu.

Ua faailoa i se pepa o faasalalauga mai le ofisa o le va i fafo a le Malo o Ausetalia o loo faagasolo pea faatalanoaga o lenei polokalame fou mo visa nofomau ma isi atunuu o le Pasefika.

E 3 afe tagata o le a agavaa i le nofomau i lea atunuu pe a talia a latou talosaga e pei ona vaevae mai le aofaiga o tagatanuu o atunuu ua amata ai e maua lea visa nofomau.

O le atunuu o le Federated States of Micronesia e 50 o latou tagata e maua lea nofomau.

Fiti e 300, Nauru e 100, Palau e 50, Papua Niu Kini e 1,350, Solomona e 150, Timor Leste e 300, Tonga e 150, Tuvalu e 100 ma Vanuatu e 150.

Ua faailoa e lea Malo o se polokalame lenei e siitia ai le sootaga o Ausetalia i tagata Pasefika i le faamoemoe e siitia le numera o tagata Pasefika e faamautu i lea atunuu ma maua ai galuega e fesoasoani i le tamaoaiga o o latou aiga ma atunuu.

O le lē aofia o Samoa i le amataga o lea polokalame nofomau a le Malo o Ausetalia, ua sauniuni ai foi o tatou tagatanuu o nonofo i Samoa i latou mai le 18 e oo i le 45 tausaga le matutua e ave talosaga nofomau i le polokalame masani o le nofomau i Niu Sila lea e tatala i le masina fou o Me.E ui tatou te lē o maua le avanoa i le amataga o le polokalame nofomau a Ausetalia, ae o le faitotoa vātele o o tatou tagatanuu e ulufale ma nonofo ai i Ausetalia ma maua le galuega, o le sitiseni Niu Sila pe a manuia le talosaga i le nofomau le quota scheme i Aotearoa