O Sarai Bareman, o se tamaitai afakasi Samoa ua filifilia nei e le faalapotopotoga tele a le lalolagi o le taaloga soka, le FIFA, e avea ma Chief Officer na te pulea atoa le faalapotopotoga o soka a tamaitai i le lalolagi atoa a le FIFA.

O lona tulai mai i lenei tofiga o se faaeaea matuā maualuga lenei mo se tamaitai atu i lenei itu o le lalolagi, aemaise ai o se tamaitai Samoa na amata lona olaga taalo i le soka i Aukilani faasolo atu ai i Samoa lea na faaulu ai ia te ia le asosi soka a Samoa, ma agai atu ai lava seia oo ina ua iloga lona tulai mai totonu o le faalapotopotoga atoa, ma filifili ai loa i lenei tofiga taualoa a le FIFA.

Na ta’ua e Sarai lu’itau na feagai ma ia, a o taumafai e uunaia le taaloga soka mo teineiti laiti aemaise a o iai i Samoa. Sa lei taliagofie e i latou sa i tulaga maualuluga le faanaunauga sa ia te ia ona e manatu le toatele o le soka o le taaloga a alii ae lē mo tamaitai.

Peitai e lei faavaivai ai Sarai e momoli pea lana finau e leai se papuipui o le taofia o tamaitai mai le faatinoina o le taaloga soka, ma ina ua avea o ia ma sui o Samoa i se fonotaga mo talavou ma taaloga mo le Pasefika na usuia i Niu Kaletonia i le 2013, na faia ai se tautalaga a Sarai ma ia faamamafa ai lona matuā teena o faiga faailogatagata agai i le itupa o tamaitai i totonu o le taaloga, ma e iai lona manatu, atonu o lana tautalaga lena na amata ai ona maitauina e faatumutumuga o le faalapotopotoga lona tomai o se taitai.

O lona tina o Helen Bareman o le Samoa ma lona tamā o Eugene Bareman Snr o se tagatanuu Holani (Dutch), ae na fanau ma soifua ane Sarai i Aukilani i Sisifo i Niu Sila.

Ta’ua e Sarai, o lona aiga atoa o ni tagata e naunau i le lakapi. O ona tuagane e toatolu e taalo lakapi uma, o lona tamā o se faiaoga i se aulakapi, faapena foi i lona tina o se manager i aulakapi, ae o se tulaga na faate’ia ma le fiafia ai lona aiga ina ua fulitua o ia i le lakapi ae agai i le taaloga soka.

O le faatalanoaga lenei a Sarai ma le alii faasalalau o John Campbell i le polokalame a le TV1 o le Sunday, sa fesiligia ai e Campbell le tamaitai o Sarai pe aisea e lē taitai ona misi sona sei i lona taliga.

Na ta’ua e Sarai, o le fai o lona sei, e le tau ina faamanaia ai ana teuga, ae e na te faia ma le mautinoa e tatau lava ona fai sona sei, ma ua maitaulia ai o ia; afai e misi ona fai sona sei, e fesili atu tagata poo fea lona sei. O lona sei e faamanatu ai pea ia te ia lona amataga, lona tupuaga, lona faasinomaga poo ai o ia, ae o fea e sau ai. Poo fea lava le atunuu ua iai, le maoa’e o le tofiga ua ia umia i se faalapotopotoga tele o le lalolagi, ae o lona sei e na te manatua ai pea o ia o le teine Samoa afakasi na tupuga ane i Aukilani Niu Sila ma faasolo atu ai lona olaga ta’uta’ua ua iai nei.

E 211 atunuu o loo iai i totonu o lenei faalapotopotoga o loo pulea atoa e le tamaitai afakasi Samoa, ma na ta’ua e Sarai, o lona sini o loo taulai atu i ai ina ia oo atu 2026 ua oo i le 16 miliona tamaitai e taaalo i lenei taaloga o le soka.

O le tausaga fou 2023 i le masina o Iulai o le a faia mai ai i Niu Sila le taamilosaga o le Ipu a le lalolagi o le soka.