O se tasi o polokalame logologoā a Ausetalia ua faaigoaina o le “Survivor” lea ua iai le faamoemoe o le a pu’e i Samoa i le masina a sau nei. 

Na faamaonia mai lea tulaga e le Sydney Morning Herald i le faai’uga o le vaiaso ma o le aso 1 o Aokuso e fuafua e taunuu ai i Samoa le aumalaga e aofia ai le au pueata ma tagata o le a tauva i lea polokalame. 

I lipoti a le Samoa Observer na faapea ai o se tasi o kamupani i totonu o le atunuu le Sleeping Giants Films sa o latou faia se faasalalauga i vaiaso ua tuanai e saili ai nisi o loo iai le tomai i tulaga tau pueata. Ma ua iai masalosaloga o le pueina o le Survivor i Samoa ua ala ai nei faasalalauga. 

E ui e le’i faamaonia mai e le Sleeping Giants Films pe moni tusitusiga e faatatau i le filifilia ai o Samoa ma atunuu e pue ai lea polokalame ae na o latou ta’ua e tatau ona faafesootai le Pulega o Tagata Tafafao Maimoa mai Fafo mo nisi faamatalaga.  

O le tausaga mulimuli na talimalo ai Samoa i lea lava polokalame a le Survivor Australia o le tausaga 2016.