O i latou e faatinoina gaioiga e pei o le faaaogaina o tusitupe a tagata e transfer agai iai ni tupe i se auala faasolitulafono, poo money mules i le faaperetania ua faailoa mai ua pueina e leoleo nisi o i latou ia.
Ua lipotia e le Stuff e 60 tausaga o se alii mai Aukilani na pueina ma molia e leoleo i moliaga o tupe teu faasolitulafono e toeititi $2 miliona na aofia ai.
Fai mai e toatolu ni tagata ua pueina i lenei mataupu e aofia ai ma se isi alii 54 tausaga mai Hamilton lea na agai ane lava ia i leoleo.
Ua faailoa mai foi e le satini sinia, o loo faaauau pea i le taimi nei ona latou suesue mataupu nei i faiga taufaasese e aofia ai term deposits poo teugatupe faavaitaimi lea e faapea ua faitau miliona ua aafia ai.
O le faagaioia la o lea faiga e pei ona tuuina mai ai se faataitaiga e le Stuff.
O le fake bank poo le faletupe taufaavalea na te viliina tagata ia tatala ni a latou teugatupe faavaitaimi, latou te faailoa i tagata o le a transfer mai se tupe agai i se tusitupe Niu Sila a le money mule ona toe lafo ai lea e le tagata lea o le tupe lava lea e tasi i se isi account i fafo atu o le atunuu.
Fai mai leoleo o loo galulue faatasi nei ma faletupe ina ia toe maua mai nisi tupe a tagata ua aafia i nei faiga taufaasese, ae mo le taimi nei e toatasi le tagata ua toe maua ane le 60 afe o lana tupe sa aafia i ia faiga faasolitulafono.
