Faailoa le faaaloalo ma alofaaga o le komiuniti o tagata Samoa i Aotearoa i le sauniga faamanatu mo nai alii faigaluega e to’alua i galuega faavaitaimi sa maliliu i le faalavelave tau taavale i Ramarama i le aso 26 o Aokuso i le tausaga nei e pei ona lausilafia e le to’atele lenei faalavelave, to’atolu na maliliu ai o nai alii e to’alua ma si o la uncle sa faia ona toe sauniga i le Aso Faraile.
Na lipotia e le leitio faavaomalo a Niu Sila o le feiloa’iga sa faatino i le Fale o Samoa ma auai ai le sui ta’ita’i o le Leipa, Carmel Sepuloni, faauluuluga o le ofisa o le Hai Komesina o Samoa i Niu Sila, Afamasaga Faamatalaupu Toleafoa faapea foi ma le Konesula Aoao o Samoa, Afemata Palusalue Faapo II.
Na ta’ua foi i le lipoti o le itulau sailitupe sa tuufaatasia e se sui o le pulega faalotoifale a Otara ma Papatoetoe, Li’amanaia Lorenzo Kaisara e fesoasoani ai mo si aiga na maua ai se vaegatupe e silia ma le $59,000.
Faailoa i le lipoti le agaga faafetai o sui o si aiga mo alofaaga ma fesoasoani e ofoina mai le komiuniti Samoa i Aotearoa.
Puna o Faamatalaga: https://www.rnz.co.nz/international/pacific-news/527461/samoan-community-pay-respect-to-auckland-car-crash-victims
