O le tulaga lelei poo le quality o le fualaau o le kiwifruit ua faaauau pea ona fai ma luitau mo le au toto kiwifruit i lenei vaitau aemaise ina ua faailoa atu e le kamupani o loo maketiina le fruit le Zespri i le aufaifaatoaga ua faifai tetele le faafitauli.
I se tusi sa tuuina atu e le kamupani i le au totokiwifruit i le vaiaso na tea nei sa faailoa ai e le Zespri, o faaletonu lava i le tulaga lelei poo le quality o le fualaau sa faatupulaia pea mai lava i le tausaga na tea nei ina ua tau faaiuiu le season.
Ta’ua e le kamupani sa mafai lava ona faatino e pei ona masani ai sapalai o lea fualaau seia oo ina mae’a le season peitai ua vaaia lava le tulaga faaitiitia o le lelei o le kiwifruit aemaise lava i uta o loo aveina atu i Europa ma Asia.
Fai mai le sui o le Zespri, e ui i le popolega i le tulaga lelei o le fualaau’aina ae o loo faaauau pea ona manaomia ma talosagaina e le aufaatau.
