Popole Nanaia Mahuta i le nofo aitalafu o le Pasefika

O loo popole Nanaia Mahuta i le nofo aitalafu o le Pasefika.

I se faatalanoaga a le minisita o le va i fafo a Niu Sila ma Jack Tame, na ia faaalia ai le popolega o loo iai i le auala o loo faatupe ai atina’e i le Atu Pasefika, ma ia faatusatusa ai foi le auala o loo iai Niu Sila ma isi atunuu. 

O Niu Sila o loo tele ina faatupe i foai e lē toe totogia poo grant funding e pei ona saunoa le minisita, e faatusa i le to’atele o isi atunuu Pasefika. 

I le silasila a le minisita o se itu ua moomia le faatalanoa ona o se vaivaiga o le a faafaigofie ai ona oo i se isi tulaga ma e lē i ‘alo ai foi le minisita i le avanoa o Saina. 

O se finagalo faaalia ua sau ai a o faaletonu le tamaoaiga ma vevesi le malo o Sri Lanka ma e iai se vaega o loo tuua’ia ai a latou aitalafu o loo nofo aitalafu ai isi atunuu. 

O le faai’uga o le vaiaso faato’ā taliu mai ai le minisita mai le fonotaga a le Pacific Islands Forum lea na lūlūina ai i le faaseetuagalu faafuase’i o Kilipati, ma o le ofi mai o Saina i le itulagi o se tasi lea o itu na tele na talanoaina i Fiti.