Ua popole le minisita o le Koviti e ono oo atu I le faaiuga o le masina o Iuni ua uma tui

Faailoa e le alii minisita, Chris Hipkins, e 16,000 tui na faia I le Aso Faraile faatoa uma atu ma o se fuainumera maualuga lea ua faamauina o tui e alu I tua I totonu o le aso e tasi, ma o le vave o le alu o tui pe a fua I lea maualuga e ono oo atu I le faaiuga o Iuni ua leai ni tui ao lea e le I sau le isi uta

E ui I le popole o le minisita, o loo iai lava lona talitonuga e mafai ona faasoasoa lelei ia aua nei vave ona uma ma e le masalosalo Hipkins i le polomisi a le Pfizer o le a taunuu mai lava ia Iulai le isi uta tele

I le taimi nei e na o le tui o le ituaiga Pfizer lea o loo faaaogaina I totonu o Niu Sila mai le toafa na muai saini ai Niu Sila e na te faaaogaina

Ua faamautinoa mai foi e le minisita o loo galulue malosi sui o le soifua maloloina I le faasooina o le tui, ma atonu e iai nai vaiaso o le a lemu ai ao talia le taunuu mai o isi tui faaopoopo

O le fuafuaga lea o loo iai ia uma ane le masina fou ua maea faia le 1.1 miliona tui o le Koviti