Ua polomisi mai le malo o loo agai nei e toe faalēaogā tulafono na suia e le faigamalo faatoa uma atu lea e taulai i faiga nonogatupe ma tului maualuluga lea e uma ane ua lē gafatia ona totogi.
O le tausaga e 2021 na toe teuteu ai le Credit Contracts and Consumer Finance Act e tali atu ai i pulega nei e faia nonoga tupe a tagata e mulimuli mai ai tului maualuluga tele ae e lē gafatia e tagata ona totogi.
O se teuteuga foi ua oo ai lava i faatauga e pei o faatau i le Kmart, o peimeni mo fagafao faapea meaai faatau i fale’aiga ua oo iai iloiloga ma e iai tagata na toe teena ai talosaga o nonogatupe mo fale.
O le aso ananafi na faamaonia mai ai e le minisita o fale, Chris Bishop faapea le minisita o pisinisi, Andrew Bayly sitepu muamua o le suiga ua savalia nei, ma le tala o nei sitepu amata o le a faafaigofie ai e lē gata mo le tagata o loo faatalosaga mo se nonogatupe ae faapea foi le pulega o loo nonō mai ai.
O suiga o faiga faavae o le a saoloto mai ai puleganuu mai le tulafono o loo iai nei, o pisinisi e aofia ai ma fale taavale ma isi pisinisi e faamalieina teuteuga o loo faasolo nei.
E leai se aso mautu ua faailoa mai e minisita a o sau ai le faasilasilaga ananafi, na ona fai mai o masina o i luma o le a aloaia ai suiga.
O le teuteuga o loo iai nei mai le 2021 ua faatusaina ai e tusa ma le 7% na faaitiitia ai talosaga na talia o nonogatupe mo fale faatau.
Puna o Faamatalaga: Ministers promise it will soon be easier to get a loan | Stuff
