Ua poloaiina e le Afioga i le alii Faamasino ia Leota Raymond Schuster le iai o se potu faapitoa e tuuina iai Sam mo lona saogalemu.
O lea tulaga ua faia ona ua faailoa atu e le loia a Sam i le Faamasinoga e faapea o loo iai le taufaamata’u i le alii o taofia mai isi pagota.
O i latou ia sa maua e leoleo ma ua tuli o latou faasalaga sa avea ai Sam ma informant poo sē sa ia aveina faamatalaga i leoleo e faatatau i mataupu a ia tagata.
O le isi tulaga o loo faatonuina e le fomai le faia o se fā’ata o lea alii, ona o aafiaga e pei o se ma’ilili o loo maua ai Sam ma o taeao i le 10 i le falema’i i Motootua.
Na faailoa e le tamaitai o loo tulai mo leoleo i le mataupu lenei le susuga Leinafo Taimalelagi Strickland e mafai ona aumai e leoleo Sam mo le fā’ata peitai sa oo atu tala mai leoleo ua na o le taliga o Sam o loo aafia ma e leai se ma’ilili.
O le tulaga foi i le taufaamata’u ua saunia le sela e nofo ai Sam na o ia.
O le sela lea sa iai tupulaga talavou poo tamaiti na taofia ai.
Na faamanino e le loia a Sam ia Fetu Lagaaia ona o popolega i oso se ma’i o lea alii na o ia i le sela.
Na ta’ua e le tamaitai loia ia Leinafo o loo tilotilo i se custody officer poo se leoleo e vaaia ē taofia e siaki Sam tai itula pe afai o le a nofo ai i le sela lea.
Ua poloaiina ai e le faamasinoga se leoleo taofia e vaavaaia Sam ma siaki tai itula.
O loo taofia pea Sam ma Sivai i le vaaiga a leoleo e faatali ai le aso 13 o le masina nei e tulai ai mo le talosaga a le loia a Sam lea ua mae’a faila i le faamasinoga ina ia tatala i tua e faatali ai le aso 20 e tulai ai.
O le taimi nei e lei mautu mai lava moliaga a le itu a leoleo faasaga ia Sam.
