O le faaiuga o le vaiaso i le taimi o taaloga mo le Ipu o le lalolagi o le lakapi iuni a tamaitai, o le a faatulaga faatasi ai ma le faaeeina atu o se isi foi faailoga taualoa i le tamaitai lakapi ae o se alo o Samoa, o Seiuli Fiao’o Faamausili, o le tuuina o lona suafa i luga o le laupapa o loo faamauina ai suafa ua o i latou ua filifilia o nisi ua maoa’e o latou tomai sa faatino i lenei taaloga o le lakapi.

O loo lipotia i talafou a le PMN lagona o le tamaitai o Fiao’o ina ua ia maua le tala o le a aofia lona suafa i le World Rugby Hall of Fame.

‘E lei iai so’u mafaufau o le a tupu se mea faapea,’ o se saunoaga mai le tamaitai na avea ma kapeteni o le Black Ferns.

Saunoa Fiao’o, sa ia taalo ma le naunau ona e fiafia tele lona olaga i le lakapi, ma sa lagolago malosi foi lona aiga ma ana uo i ana taaloga, ma o le iai o se tulaga faapea ua amanaia ai lana tautua lakapi i lenei fola maualuga, o se matuā faaeaea lea mo ia i lana taalo.

O le a faia se sauniga faapitoa a o fai semi-finals mo le Women’s Rugby World Cup i le malae Eden Park i le faaiuga o le vaiaso.

O le maua ai e Fiao’o o lenei faaeaea maualuga, e eseese lava ona lagona i lenei taimi; e ui i le fiafia ua amanaia lana tautua lakapi, ae o ona lagona ma’imau e, pe ana ia maua lenei faailoga ae o soifua mai pea si ona tuaa tamā se’i ona patipatia lenei faamanuiaga.

Faamatala e Fiao’o e ese le naunau o si ona tamā i ana taaloga uma lava sa taalo ai. E oo lava i ona taimi mulimuli ua faasolo ina faigata lona gasegase, e taumafai lava e alu atu i mea e fai ai ana taaloga, poo le ā le mamao, e alu atu lava ma nofonofo atu i totonu o lana taavale. E le taitai foi ona faitio mai pe faapea ua leaga sa’u taaloga; e fiafia lava ia ma faaali mai foliga e faalototele atili ia te au.

Ua 42 tausaga o le soifua o Fiao’o, ma e ui lava i nei mau faailoga taualoa ua faaeaina ai lana tautua taalo, ae i lona lava mafaufau, e le o ia o se superstar poo se legend i le taaloga. Na soifua mai Fiao’o i Samoa, ona malaga mai ai lea ma lona aiga i Niu Sila auā lava sailiga manuia mo le lumanai.

O le filifilia ai o Fiao’o mo lenei faailoga taualoa, e fua lava i le maualuga o faamaumauga o mea na ia ausia i le lakapi. E 57 taaloga na ia taaloa ai mo le Black Ferns ma na filifilia e avea ma Kapeteni o le Black Ferns mai le 2012 e oo i le 2018, ma ia taitaia ai le ‘au i ana taaloga e 34.

E lima taamilosaga o le Rugby World Cup na taalo ai, ma sa aofia ai i le ‘au a Niu Sila ia latou manumalo i Ipu o le lalolagi i le 2002, 2006, 2010 ma le 2017.