I le ono aso o tauaofia le Palemene i lana fono usu e talanoa ma soalaupule le tala autu lona lua o le tupe mo le tausaga faaletupe fou 2022 i le 2023, o le lata i le fitu o le afiafi o le Aso Lulu na pasia ai e le fono aoao lea fuafuaga tau tupe a le faigamalo fou.
O le malosi o faitioga ma finagalo lagolago o nisi o sui faipule, aemaise le fesiligia e le Itu a le vaega faaupufai e puipuia aiātatau a tagata o loo agaia le Malo o le faaaogāina o tupe, na taunuu uma ia finagalo faaalia i le ave o le faamalo i le tamaitai Minisita o Tupe ma lana matagaluega i le tapenaga.
O le Aso Lulu le aso mulimuli o taualumaga a le Palemene, sa auai le ta’ita’i o le Malo le afioga i le Tamaitai Palemia ina ua toe faaolatia i fanua lana ulua’i malaga faalemalo i le valaau faaaloalo a le Malo o Niu Sila, ma auai foi i nisi o fonotaga faavaomalo. O le Tamaitai Palemia le afioga Fiame Naomi Mata’afa, na taualuga iai tali a le Kapeneta ma le faigamalo i mataupu na laga i le tala autu o le tupe, ma ave ai foi lana faafetai i le tapua’iga a le Palemene aemaise o le atunuu atoa, a o toesea mo ona tiute faalemalo.
Sa ia folasia foi i lana saunoaga se tala otooto o lana faigamalaga, ma autu o mataupu sa lauliliuina e lē gata i le fono ma nisi o ta’ita’i o Malo o le Pasefika i le tau fofoina o le teva a atunuu i Matu mai le toe avea ma sui o Malo o le Pasefika lea ua toe masuiga mālie, ae faapea foi i feiloa’iga ma le Tamaitai Palemia o Niu Sila ma ta’ita’i o lena Malo faapea le mamalu o tagata Samoa i Aotearoa, ae faamuliga i le fono a ta’ita’i o Malo o le Taupulega lea ua faamautu le talimalo ai o Samoa o se atunuu muamua i le Pasefika o le a faia mai iai lea faatasiga a atunuu e 54 o Malo o le taupulega i le tausaga e 2024.
O le mae’a pasia e le Fono Aoao Faitulafono o le tala autu lona lua a le faigamalo, ua tolopo ai ana galuega e toe tauaofia i le aso 23 o le masina o Aokuso.
