O se kulupu i Niu Sila e tula’i mo aiātatau a tagata ua o latou taliaina ma le fiafia le lagolago ane a nisi mai atumotu o le Pasefika i le mataupu e faatatau ia West Papua lea e i le itu i Sasae o Indonesia lea foi o loo faamautū ai le vaega o le militeli a Indonesia talu mai lava le 1960.
Fai mai le RNZ o West Papua e i le itu i Sasae o Indonesia ae ogatotonu i le motu o New Guinea ae o le ‘afa o le itu i Sasae o New Guinea lea e ta’ua o Papua New Guinea.
O le kulupu la lea i Niu Sila, le West Papua Action Aotearoa ua o latou faailoa o le ulufale o Indonesia i le itu lea o Papua o se mataupu ua matua’i oia ai aiātatau a West Papua ma ua leai foi se sa’olotoga o le autusitala, e lē gata i lea ua to’atele tagata o West Papua ua nofonofo solo ona o le militeli a Indonesia.
Fai mai le kulupu lea e to’atele tagata e lē iloa le mea e tu ai West Papua ona e matua’i leai ni autusitala e oo iai i lea faaitu ae e na o le tasi le itula e va ai ma Darwin i Ausetalia ma e to’atele foi e lē o malamalama i le tulaga o loo iai lea faaitu ma o se mataupu ogaoga.
I se pepa o faamatalaga na tuuina atu i le pulega o le vaega o aiātatau a Malo Aufaatasi na faailoa ai le tutū faatasi o ta’ita’i mai Vanuatu, Maikorenesia, Marshall Islands, Nauru ma Samoa e valaau i le komiuniti faavaomalo ia lagolago i tagata i West Papua.
Ua faafetaia e le West Papua Action Aotearoa, Samoa ma lona lagolago ane i nei taumafaiga.
Puna o Faamatalaga: https://www.rnz.co.nz/international/pacific-news/545803/pacific-island-nations-unite-to-support-west-papua-amid-human-rights-violations
