O le lipoti lata mai a le matagaluega o le soifua mālōlōina i le pipisi o le faama’i Koviti-19 mo le lua aso talu mai le aso 19 i le aso 21 o Iuni, ua faamauina le uluai pepe teine ua tasi le tausaga le matua ua fano le ola ona o le faama’i korona vairusi.
E lei faia sona tuipuipui o le faama’i ae leai ni ona ma’i tumau. Ua faamauina ai nei le aofaiga e 29 o tagata ua maliliu i Samoa ona o le faama’i. O isi faamaumauga mai le auaunaga a le soifua mālōlōina ua faailoa ai e to’a fasefulu (40) gasegase fou i totonu o le lua aso sa tuufaatasia ai le lipoti lata mai ma ua oo ai le aofaiga o tagata i le atunuu ua aafia i le faama’i i le 14,812.
E to’atasi le gasegase o loo i le nofoaga faapitoa i le maota gasegase i Motootua ae leai ni gasegase i potu tigaina. O loo tumau pea i le 123 gasegase mai tagata malaga mai fafo e leai se faaopoopoga talu mai le lipoti o le fitu aso na faailoa i le amataga o lenei vaiaso.
