E oo mai le taimi nei o loo faatino foi le su’esu’ega a leoleo i se isi foi faleoloa o Michael Hill Jewellery i Aukilani lea foi na agai iai se isi osofa’iga i le afiafi ananafi i le taulaga faatau i Botany.
Lipotia mai e le Newshub o se kulupu o le au solitulafono na agai ane ma ni meafaigaluega ma faaleagaina ai nisi o kapeneta tioata i le nofoaga ma o le faamatalaga a leoleo na aveesea mai ai ni aitema mai le faleoloa.
O taavale e lua na faaaogā i le osofa’iga lea na maua mulimuli ane ua tia’i i se nofoaga e lē mamao ese. E talosagaina e leoleo le fesoasoani a le atunuu i ni faamatalaga e silafia e tusa o lea osofa’iga ina ia fesoota’i ane i le ofisa o leoleo poo le Crimestoppers.
O le Aso Lulu talu ai na pu’eina ai se isi alii i le gaoia o le jewellery store i le taulaga faatau i Meadowbank ae o le Aso Gafua foi na valaau ane ai leoleo i le faleoloa o TJ Handcrafted i East Tamaki i le aoauli ona sa gaoia foi e ni alii se toalua. O loo faaauau pea su’esu’ega a leoleo.
