I se tusitusiga na faia e Letelemalanuola Tuitofa Moe Penn i luga o le upega tafailagi (Facebook) na faailoa ai lona faanoanoa tele i se faalavelave na tulai mai i le po anapo i le nofoaga a le Ekalesia Faapotopotoga Kerisiano Samoa Taeaoafua i McKenzie Road i Mangere. 

I lea tusitusiga na ta’ua e Letelemalanuola e to’aono ni alii talavou Pasifika mai le 17-18 tausaga le matutua na oo atu i le nofoaga a le Ekalesia i le 7:30 agai atu le 8:30 i le afiafi ma o loo umia ni auupega matautia, e pei o iliafi, nail guns, agaese (sei tulou) faapea samala ma valaau atu i fanau aoga Aso Sa o loo fai a latou tapenaga mo le lotu o tamaiti e omai i fafo. 

Faailoa foi e Letelemalanuola na faaleagaina foi e nei tupulaga meatotino a le ekalesia faapea taavale a nisi o faiaoga Aso Sa na talepe e i latou ia faaaoga ai samala. 

Na matuai lagona le fefefe o fanau o le Aoga Aso Sa ona o lenei faalavelave ma ua talosagaina e le fesoasoani a le mamalu o le atunuu i Mangere poo ai e silafiaina nisi o i latou ia na faia nei gaioiga le alofa ina ia vave logo ofisa o leoleo.