O le pamu penisini a le Caltex i Clark St i le pitonuu o New Lynn lea foi na osofaia e ni tagata se toalima ma valaau ane ai leoleo i lea nofoaga poo le ‘afa o le 11 i le po anapo.

O le ofisa o leoleo i Waitemata ua o latou faailoa o le kulupu lea na faatinoina le osofaiga sa pupuni uma foliga i matapulepule ma sa o latou tata’e le faitotoa tioata o le pisinisi ma ulufale ai.

Ua o latou gaoia le pusa tupe a le faleoloa ma sosola ese ai i se taavale.

Sa iai le tagata faigaluega i totonu o le faleoloa i lea taimi ae e lei aafia.

Ua faailoa mai e leoleo ua maua le taavale na sosola ese ai le augaoi ma o loo faaauau pea le latou suesuega.

E tai faapea foi se isi osofaiga na faia i le amataga o le masina i Western Springs na pue ai e leoleo ni talavou e toatolu na o latou osofaia le pamu penisini i le faaitu lea, na o latou gaoia foi le faleoloa ma faaoolima ai i le tagata faigaluega sa iai.

O loo faia pea suesuega ae lē mailoa pe fia se tupe o iai i le til a le faleoloa lea ua o le augaoi ma ave.