Ua toe tapisa le tapuaiga a Samoa i totonu o Aukilani e pei ona amata mai le vaiaso talu ai a o alo atu lana Toa Samoa i lana taaloga ma le ‘au malosi a Ausetalia le Kangaroos i le Aso Toonai 14 o Oketopa lea sa faia i Ausetalia. 

Ua toe faalogoina leo o pu o taavale i luga o le auala, o fu’a ua faalelea solo faatasi ai ma le pepese o tagata Samoa, ua faaali ai le latou lotonuu ma le loto tapuai i alo ma tamafanau o Samoa o loo tauavaeina le igoa o le atunuu i tulaga o taaloga. 

Ua toe faamanatu mai i lenei taimi lagona sa iai le tapuaiga a le atunuu a o iai lana Toa Samoa i le Ipu o le Lalolagi i le tausaga 2022. 

O upu e masani ai le atunuu e faapea, o lou loto lea o lou fatu lea ou te tau ai mo oe Samoa. 

O solo o taavale na amata mai i Otahuhu ae faatini i le taulaga faatau i Magele i le nofoaga o loo tele ina faagasolo ai polokalame a Samoa. 

O le tofa ia Leulumoega Teleiai Edwin Puni ma lana team sa nafa ma le tapenaga o lenei faamoemoe. 

O le Aso Toonai na taualuga ai le solo a taavale i le aso fiafia poo le aso faapitoa e valaaulia uma ai le mamalu o le atunuu e agai atu i totonu o le taulaga faatau i Magele e militino faatasi ma fiafia ma tapuaia le alofaiva o lana Toa Samoa i lana taaloga. 

O se feau momoli poo se faamalosi’au i fanau o loo taaalo ina ia latou iloa o latou faiva alofilima o loo tapuaia e le atunuu. 

Ma o fea lava e iai le Samoa e lagona lava lona toto ma lona faasinomaga ma lona tupuaga, ma o le ala foi lea na tapenaina ai e le susuga ia Li’amanaia Lorenzo Kaisara ma lana ‘au lenei polokalame ona o le tutu faatasi e tuu atu le tau’au e tapuaia ai faiva o taaloga a alo ma fanau a Samoa. 

Na maitauina le maualuga ma le matagofie o tapenaga o lea faamoemoe, i le tele o faafiafiaga pepese eseese sa iai, o ausiva faapea ma tickets o le taaloga a le Toa Samoa ma le Kiwi i le vaiaso fou sa fai ai faailoga e tali masinei ai le taupati atu o le mamalu o le atunuu. 

O lagona o le fiafia sa vaaia mai mātua matutua sa auai seia oo lava I fanau laiti. 

O le faamoemoe maualuga lava ina ia siitia ma tutu faatasi o tatou tagata e tapuaia le Toa Samoa ma ana taaloga o loo faatinoina i Ausetalia faapea ma Niu Sila nei i le malae o Eden Park i le vaiaso fou, 21 o Oketopa.