O le susuga i le faafeagaiga ia Rev Valoaga Ropati ma le faletua ia Uati Ropati sa galulue ma lolotu i le ekalesia EFKS Weymouth i lalo o le taitaiga a le susuga i le faafeagaiga ia Siloa Lologa, ona sue lea i le kolisi faafaifeau i Malua ma manuia ai lo la taumafai ona aooga ai loa i le Kolisi i Malua i le 4 tausaga.
Na mae’a le aoga ona galulue lea i le ofisa o le aoga kerisiano i Malua o se tasi o vaega o le itutino o le ekalessia e sue ai le faifeau faamaoni, ma o lea sa faauuina ai loa i laua e avea ma faifeau faamaoni i le tausaga e 2022.
O le tausaga ua mavae 2023 na agai mai loa i Niu Sila nei ma faatuina le lotu i matafale e tolu.
Na saunoa le susuga i le faafeagaiga ia Rev Valoaga Ropati e lei faigofie le amataina ma le sailiga o agaga o tagata mo le Atua ma lona malo, ae o le faamoemoe lava i le fesoasoani mai o le Agaga Paia o le Atua na mafai ai mea uma i lana galuega, ma o le taimi nei ua 13 matafale ua galulue.
O le aso 29 o Aperila i le tausaga ua mavae na faatuina aloaia ai le lotu i Everglade, ae o le aso 23 o Fepuari i le tausaga lenei i le vaiaso ua mavae o lea ua osifeagaiga ai loa le ekalesia ma le susuga i le faafeagaiga ma lona faletua e tusa ai ma faiga faavae o le ekalesia.
O le Aso Toonai ua mavae na tumutumu ai le ekalesia EFKS i Pakuranga i susuga i faafeagaiga ma o latou faletua o le Pulega a Manukau i Sisifo faapea aiga na lua, o uo ma ē masani e molimauina le sauniga o le osigafeagaiga a le ekalesia EFKS Everglade ma le susuga i le faafeagaiga ia Rev Valoaga Ropati ma le faletua ia Uati Valoaga.
O le susuga i le toeaina o le Pulega ia Rev Vaaelua Patu na ia taitaiina le sauniga.
Na mae’a le sauniga ona sosoo lea ma le taumafataga sa faia i le hall a le ekalesia EFKS i East Tamaki.
O le susuga ia Vaili Lauina Tuipulotu sa tu tootoo o le aso i le ekalesia e momoli le agaga faafetai i le aufaigaluega a le Atua o le pulega faapea aiga, uo ma ē masani i le afifio atu e molimauina le faamoemoe o le ekalesia e pei ona faataunuuina ma le manuia.
Ona taualuga foi lea o le aso i faaaloaloga masani e pei ona iai aso faapenei i totonu o ekalesia.
