Fai mai le palemia o Ausetalia, Scott Morrison e ono toe tali mai Lusia ia Ausetalia ma sa poo sanctions ia ua faia e Ausetalia agai ia Lusia e ala ise cyber attack poo osofaiga I luga o upega tafailagi I faiga faaonaponei.

O le aso 22 o Fepuali na aafia ai Ukraine I le ituaiga osofaiga lea sa agai sao lava I auaunaga I upega tafailagi a matagaluega tau le va I fafo ma tulaga tau le puipuiga a le atunuu.

O le faatalanoaga la a le palemia o Ausetalia ma le au tusitala I le aso ua ia taua ai o faiga osofaiga ia I luga o upega tafailagi o se tulaga ua faatupulaia pea mae ono aafia ai faalapotopotoga I Ausetalia ma e tatau ona toe silasila I latou ia I le toe iloiloina o tulaga tau le puipuiga mai ia osofaiga ina ia mafai ona malu puipuia mai ai.

O loo finau foi Morrison I isi atunuu ina ia o latou faailoa lo latou tetee ile gaioiga a Lusia o loo tau fai nei I Ukraine ma faailoa foi o le a gaioi lava Ausetalia ia o gatasi ma gaioiga a ana paaga poo allies.

Fai mai a ia e le taumate o le a vaaia pea se siitaga I le tau o le penisini onao le tulaga o loo iai le penisini ile lalolagi.

Ua toe faaopoopo foi e le faigamalo a le feterale visa o tagata Ukraine I Ausetalia, I latou ia e maea o latou pemita ilea so 30 o Iuni o le tausaga nei.