Ua faamautu moliaga e ono a leoleo i le faalavelave i Fogapoa i Savaii na maliliu ai se tamā ma sona atalii i ni manu’a mai se laau malosi.
O lē ua molia o Aui’a Fereti Moefiti o se tamā 54 tausaga o lona soifua ma ua molia i moliaga e lua o le faaoo o le maliu, moliaga o le taumafai e faaoo le maliu i se tamaitai na aafia i se manu’a mai se laau malosi, ma moliaga o le faaoo manu’a tuga, o le umia o se a’upega mata’utia, ma le faaaogāina o se laau malosi.
E lei tuuina se tali a lē ua molia ae o loo tapena e lana loia se talosaga e tatala ai i tua mai le vaaiga a leoleo e pei ona nofo taofia i le falepuipui i Tanumalala talu mai le aso na tupu ai le faalavelave. O loo taofia le tusifolau o Aui’a e tusa o aiaiga o loo nofo taofia ai, e faatali le Aso Gafua a sau o le a toe tulai ai i le faamasinoga mo le tuuina atu o lana talosaga e tatala ai i tua.
O se feeseesea’iga i se fanua na faaalia e leoleo o le mafuaaga lea o se feteenai’ga na tupu ai ma le faalavelave i le aso 23 o Iuni na faaaogā ai se laau malosi o se fana laititi o le ituaiga o le 22. O i laua na maliliu i le faalavelave o Su Pa’i Tonise ma Phillip Su Pa’i o Fogapoa.
