E ono iai i se tulaga faaletonu le avea o Iapani ma se tasi o paaga a le Pacific Island Forum ona o le mataupu e faatatau i le otaota faaniukilia o loo fuafua Tokyo e lafoai i le Vasa Pasefika.
O se tala lata mai o lenei mataupu ua lipotia i le RNZ i le vaiaso nei ua faailoa ai o loo fuafua Iapani e amata lafoai le miliona o tane o otaota faaniukilia mai le Fukushima Daiichi nuclear plant lea ua faaleagaina, agai i le Pasefika i nai masina o lumanai ai.
Pe a fua i faamatalaga a le malo o Iapani ua o latou ta’ua ai o le wastewater poo le suavai palapalā lea o le a togafitia e le Advanced Liquid Processing System ona aveesea ai lea o mea e afaina ai le suavai ma o le suavai o le a lafoai i le sami e le o faaleagaina.
Ua faailoa i le vaiaso nei e le failautusi aoao o le Forum o Henry Puna, ina ia faatumauina pea le avea o Iapani o se paaga a le Forum e manaomia ona faamautu ane fesootaiga ma le tulaga sa’o e uiga i lea mataupu.
Ta’ua foi e Puna o Iapani o se paaga tāua tele mo le Forum ae mo le taimi nei e faanoanoa e faailoa e le o fesoasoani ane Iapani i fesootaiga e faatatau i lea mataupu.
