O le vairusi o le Koviti-19 le ituaiga o le Omikoroni BA1 o loo to’atele iai tagata i Samoa na aafia i le faama’i ae o le ituaiga o le vairusi le Omikoroni BA2 e to’alima tagata na maua ai.
O le taunuuga o su’esu’ega na ave atu i Niu Sila e faamaonia ai le ituaiga o le vairusi o loo pesia ai tagata i le atunuu na aumai ai lea faai’uga e pei ona faailoa e le sui faatonu sili o le soifua mālōlōina.
O le taimi nei o loo mata’itu pea e le soifua mālōlōina le tulaga o aafiaga o tagata i le faama’i ma le alia’e mai o se isi vaega fou o le vairusi o le koviti e ono sao mai i le atunuu, e fua lea i tulaga o loo pesia ai isi atunuu aemaise o Niu Sila ma Ausetalia faapea Amerika o loo tele ina malaga mai ai tagata i le faamoemoe e afea lo tatou atunuu.
O le vaaiga lata mai e tusa o faamaumauga a le soifua mālōlōina ua 15,243 le aofai o tagata i Samoa ua aafia i le faama’i.
