O fuainumera faamaumauina i le ola matitiva o tamaiti sa faamatuuina e le Matagaluega o Fuainumera Faamaumauina – Statistics New Zealand – ua faailoa ai, e ui lava i le tuleiga e le faigamalo talu ai nei e foia le matitiva, ae e lē o iai se tulaga faaleleia.
Nai lo se tulaga faaleleia e iai, ae sa iai se siitaga faaletausaga o tamaiti ola matitiva mai le tausaga e muta ia Iuni 2022 i le tausaga e muta ia Iuni 2023, i fua faatatau e lua o fua faatatau autu e tolu, o le matitiva o tamaiti mo le faitau aofai atoa o Aotearoa.
O tamaiti Pasifika o loo faatulaga maualuga i faalavelave o vaega eseese o le ola maloloina, e aofia ai ma’i e pei o le asthma, faafitauli o nifo, faama’i o taliga, faaletonu o le faalogo ma faama’i o le pa’u nai lo isi lava tamaiti mai i isi tagatānuu.
O le tamaitai Komesina Sili o Tamaiti, Claire Achmad sa ia faaalia, o lea fuainumera mulimuli nei ua faapopoleina ai.
Mo se taimi muamua talu mai le 2018, ua tatou vaaitino i le siitia o le faatulagana o le ola matitiva, ae patino lea i le faigata ona maua e tamaiti o mea masani e moomia – material hardship – e pei ona ia faaalia ai.
O mea masani e faigata ona maua e tamaiti, o le feola lea ma le lē i lalo ma le ono vaega e moomia e faigata ona maua, e aofia ai le maua o fualaau‘aina taumafamata suamalie ma fualaau faisua, masini faamafanafana fale ma le fai ma asia fomai.
Faaalia e le tamaitai Komesina Sili, o se faafitauli e lē taliaina, ona o le 21.5 pasene o fanauiti Maoli, 28.9 pasene o tamaiti Pasifika, ma le 22.3 pasene o tamaiti e iai aafiaga tumau, o loo feagai ma nei faafitauli i aso taitasi.
O le lima ai lea o tausaga o lipotia nei faamaumauga talu mai ona faamalosia le Tulafono o Tamaiti Matitiva o le 2018.
Ma sa tāpā ai e Achmad le malo ina ia lagolagoina polokalame mo tagata Pasifika i totonu o faalapotopotoga a tagata Pasifika ua mae’a ona puevaeina le faafitauli o le matitiva.
Ma ia ta’ua ai, e tatou te moomia le faaauau o taitaiga a le Pasifika o le tuleiina o fofo i le faafitaui mo aiga Pasifika.
