E le o tapunia e le taitai o le NZ First, Winston Peters le faitotoa e savali ese ai ma le osiga o le isi faigamalo ma le ACT faapea le National, pe a leai se maliega e ausia.
Faatalanoaga a Winston Peters ma le National Business Review na ia faailoa ai foi e ono iai lava le mafai e ausia ai le maliega I le va o lana pati faapea le National ma le ACT, I lalo mai o le lua vaiaso.
Ripotia mai ai foi e le National Business Review faitioga a le taitai o le NZ First I felafolafoaiga a le National ma le ACT lea o loo faia faatasi e aunoa ma le iai o le NZ First.
Ao fai mai ai la Winston Peters e mafai lava ona savali ese, e le o fia talanoa mai poo le a le tofiga o loo ia manao iai pe a iai I totonu o le faigamalo faifaatasi ma le National ma le ACT.
Ao savali ai la I le masina talu na uma le faigapalota a Niu Sila e le I maua lava se faigamalo, ua fai mai ai foi ma Winston Peters I ofisa faasalalau e aua le fai mai so’o ua umi, aua e le se umi lea e iai Niu Sila pe a faatusa I isi atunuu e pei o Siamani e oo atu lava I le 5 masina o faatali.
