E oo atu i le 3 afe tagata Pasefika ma Timor Leste o le a mafai ona lesitala i le polokalame fou o visa a Ausetalia, le Pacific Engagement Visa lea sa faamatala muamua atu foi i talafou i se taimi ua tuanai, e amata atu i le aso 3 o Iuni lea ua folafola mai e le faigamalo a Ausetalia i le asō.
Fai mai le RNZ, o le a faaaogā se online ballot e faia e filifili mai ai i latou o le a faamanuiaina ma mafai ai loa ona o latou talosaga mo visa e malaga mai ai i Ausetalia ma nofomau ai i tausaga taitasi.
O i latou e talosaga e tatau ona maua ni a latou ofa o galuega mai Ausetalia ma ausia foi tulaga tau le soifua maloloina ma tulaga o le soifua faaletagata e manaomia a o lei tuuina iai se visa.
O atunuu la o le Pasefika o loo lesitala mo le polokalame lea i lona uluai taimi e aofia ai le Federated States of Micronesia, Fiti, Nauru, Palau, Papua Niu Kini, Atu Solomona, Timor, Tonga, Tuvalu, Vanuatu ma fai mai o loo faia faatalanoaga ma isi paaga i le Pasefika masalo e aofia ai ma Samoa.
Fai mai le minisita o le va i fafo a Ausetalia, Penny Wong ua faalogologo Ausetalia i le manaoga o taitai o le Pasefika ma ua tali atu iai, ma faia lo latou sao i le faatumauina o le filemu ma se mafutaga mautu ma le Pasefika.
Puna o Faamatalaga: https://www.rnz.co.nz/international/pacific-news/515461/australia-s-new-pacific-engagement-visa-registration-opens-on-3-june
