Ua faai’uina nei le fonotaga lona 26 a ta’ita’i o malo o le Taupulega e pei ona auai atu ai le Afioga i le Tamaitai Palemia, Hon Fiame Naomi Mata’afa ma lana aumalaga. O se tala fiafia mo Samoa, auā ua faamautu mai o le a talimalo le atunuu i le fonotaga lona 27 o le a sosoo ai i le 2024 a ta’ita’i o Malo o le Taupulega. 

O le fonotaga na talimalo ai nei le atunuu o Rwanda sa auai atu i ai usugafono mai atunuu e 54 o le Taupulega mai atunuu o Aferika, Asia, Keripiane, atunuu o le Pasefika ma Europa. 

O fonotaga nei a malo o le Taupulega e ta’ilua tausaga ma usuia, ma e fetuutuuna’i lava i atunuu eseese o loo avea ma sui auai o lenei faalapotopotoga talu mai le 1971. O le fonotaga mulimuli sa usuia i le 2018 i Peretania, ma o lea faato’ā toe faia se fonotaga talu mai ona aafia le lalolagi i Koviti-19 na lē oo ai se fonotaga i le isi lua tausaga talu ai. 

O le Aso Faraile, 24 Iuni na tatala aloaia ai lenei fonotaga i le Kigali Conference Centre. Na faafofoga ai le auusufono i le saunoaga faafeiloa’i a le ta’ita’ifono fou le Peresitene o Rwanda, H.E. Paul Kagame, sosoo ai le saunoaga a le Failautusi Aoao o Malo o le Taupulega, Rt Hon Patricia Scotland QC, le saunoaga a le ta’ita’ifono ua faamuta lona taimi, o le Palemia foi lea o Peretania, Rt Hon Boris Johnson MP, ma faamuliga ai i le lauga autū mai le faatamā o Malo o le Taupulega, HRH The Prince of Wales, o le Aloalii o le Tupu Tamaitai o Peretania. 

E tasi le vaiaso le umi o lenei fonotaga, sa aofia ai fono faaminisita, ma isi vaega eseese o le latou polokalame. O le sini autū o nei fonotaga, ina ia faamalosia atili le galulue soosoo tau’au o atunuu uma o le Taupulega, aemaise le sailiili i vaifofo e fo’ia ai nisi o lu’itau masani o loo tula’i mai a o taumafai e faalaulelei le ala mo augatupulaga fai mai. 

O le ‘au’au o le fonotaga i lenei tausaga CHOGM 2022, ‘Delivering a Common Future: Connecting, Innovating, Transforming.’ O le tatalaga aloaia o le fonotaga i le Aso Faraile, 24 Iuni, na sosoo ai loa ma fonotaga autū o Faauluuluga o Malo, ma faai’u i se latou malologa i le Aso Toonai, 25 Iuni. 

Ua toe sauni nei le usugafono a le Tamaitai Palemia ma le lana aumalaga e toe taliu i le atunuu ma le tala fiafia ua suipi Samoa i le avanoa e talimalo ai i lenei fonotaga tāua i le 2024. 

O le usugafono a Samoa o loo ta’ita’ia e le Afioga i le Palemia, Hon Fiame Naomi Mata’afa, faatasi ai ma le CEO o le Matagaluega o le Va i Fafo ma Fefaataua’iga, le Afioga Peseta Noumea Simi, le CEO o le Matagaluega a le Palemia ma le Kapeneta, Tofa Agafili Shem Leo, le tamaitai Amepasa o Samoa i Peleseuma, Francella Strickland ma le alii Leoleo Satini o loo leoina lana afioga i le Palemia, Afioga Nanai Vani Vai. 

O le usuia ai i Samoa o lenei fonotaga i le 2024 o se taimi muamua lea ua talimalo ai se atunuu o le Pasefika i lenei fonotaga tāua a ta’ita’i o Malo o le Taupulega (CHOGM).