Fai mai e 8-10 vaiaso e ono misia e le kapeteni o le Blues, Patrick Tuipulotu mai le lakapi ona o se manu’aga o loo feagai ma ia.
Ua ta’ua e le leitio faavaomalo a Niu Sila na afaina le alii kapeteni i le ‘afa muamua o le taaloga a le Blues ma le kalapu a le Tokyo Sungoliath i Iapani i le Aso Toonai ma o le a toe foi mai ai le alii kapeteni mo togafitiga ma e ono aofia ai le ‘afa muamua o le taamilosaga o le Super Rugby a lana ‘au i le umi lea o le a faamalolo ai.
O le aso 24 o le masina nei le uluai taaloga a le Blues ma le Fijian Drua i le Super Rugby Pacific.
Fai mai le faiaoga o le Blues, Vern Cotter e lagona le faanoanoa i le mataupu lea i le alii kapeteni ae o loo iai isi loka a lana ‘au o le a valaau iai e faaauau le finauga ma e lē o toe mamao ae faailoa mai sē o le a suitulaga ia Tuipulotu. O le Aso Toonai nei le isi taaloga lona lua a le Blues.
O ana pre-season matches, ma o le a fetaui ai le Blues ma le Yokohama Canon Eagles.
