O i latou e aafia i mataupu e faatatau i sauaga matagā, sexual assault o le a sili atu nisi puipuiga faaletulafono o le a agavaa ai i lalo o le suiga i le tulafono ua fuafua e ave ai se isi fesoasoani e sili atu mo i latou e aofia ai tamaiti ma tagata matutua pe a faia faamasinoga o nei mataupu.

Ua saunoa i le asō le minisita o faamasinoga Kiri Allan o le a faaulu e le malo se pili e aofia ai le mataupu o le tuuina o le faitalia i ē e aafia i sauaga faapea e faatonutonu ai le faailoaina o o latou suafa aemaise le faatulagaina o le faasalaga mo le faia o ia sauaga i tamaiti, ina ia faasala i le 20 tausaga i le falepuipui.

O le pili o le a folasia a o lumanai ai le palota i le tausaga nei ma o le a taulai sa’o lava i suiga e pei ona ta’ua ma o le a tuuina ai foi le malosiaga i le faamasinoga ia taofia ai le soona faaulu o le mau talosaga lē talafeagai ma faamautinoa ai le faiga o le aveesea o le poloaiga e faasā ai ona faailoa igoa o ē o loo aafia i se mataupu i le faamasinoga.

Ua faailoa foi o le a faaopoopo ai e le malo ma le fesoasoani tau tupe e tuuina i le Victim Assistance Scheme e fesoasoani i ē aafia i ia sauaga.