Ua tuua le malo ma ua malolo atu nei i lona oliolisaga tumau, le tinā ua lauiloa i nisi o ata tifaga pupuu sa autu i ai se faatinoga, le Afioga Leiataua Taito Afega Si’ulepa.
E mataina foi itu na iloga mai ai ona lauiloa le tina ia Leiataua, aemaise lava i le matua o lona soifua na iai, ua aulia le 80 o ona tausaga o lona soifua, ae amata loa ona sagai ane le tina ua faaaogā ai lana taleni mai i nisi o ata tifaga pupuu.
Atonu e manatua e nisi o ata tifaga na vaaia ai le loomatua Samoa o agai atu ma se sapelu telē ma faapapa’i atu i le ua o se tamaloa tino ese o loo saofai i totonu o lana taavale, ae sa ia fai ane ni faamatalaga inoino ma taufaifai i le loomatua, ma na matuā faate’ia ai lenei tamaloa ma vaaia le fefe.
O lona igoa “Ma” sa tele ina iloa ai ina ua act mai i se ata sa faaautu lava i lona soifuaga mai, ae o se faaataga o le soifuaga o se tina matua Samoa o loo taumafai e soifua lava na o ia ina ua matutua lana fanau, ua fai o latou aiga ma ua taufai oese uma mai le fale, ae tuua ai na o lo latou tina matua i lo latou fale.
O le tina ia Leiataua Taito Afega ‘Ma’ Si’ulepa na ia tuua lona nuu o Solaua i le Anoamaa ae malaga mai i Niu Sila a o talavou lava i le 19 o ona tausaga.
Na fai lona aiga ma ia tausia ane ai se fanau e to’a 11, ae ina ua matutua le fanau ma amata ona oese atu ina ua fai o latou foi aiga, e lei muta ai iina le soifua finafinau o lenei tina, ae ua amata ai loa se isi ona soifuaga fou ina ua faatino mai ni ana vaega i ata tifaga.
O se tasi o ona granddaughter, le tamaitai o Nikki Si’ulepa, e galue i lea tomai o le fatu ma faatino ata tifaga, o ia lena na ia faaaogā si ona tina matua i nisi o ana ata tifaga, ma amata ai lava ona iloga ai le tulai mai o le tina ia Leiataua.
Na oo ina amata faimalaga solo atu ai Leiataua i nisi atunuu o le lalolagi i le faalauiloaina o a la ata tifaga ma si ana granddaughter, e pei ona agai atu i Hawaii, LA, Toronto, Finland ma isi vaega eseese i totonu lava o Aotearoa.
O uiga mālie o lenei tina o loo maua lelei e le gata i ata tifaga na auai ai, ae o taimi foi e uma ai ona faaali se ata ma fai ni ana saunoaga faafetai ma faalauiloa lona suafa, ae tatau lava foi ona faaofiofi atu ai ma nisi ana tala, e faatoē ma faafiafia ai le aumaimoa.
O luga i le facebook ma isi fola o fesootaiga televavave o loo momoli ai ma faasoa lagona faanoanoa o le toatele, e le gata i aiga ma uo, ae o tagata uma sa fiafia e mulimulita’i a latou maimoaga i ata tifaga na act mai ai Leiataua.
E iai se tasi o alo o le tina, e iloga foi i lana taleni o le musika, le tamaitai o Siteine Peta Si’ulepa, o loo faasoa ana saafiafiga mo si ona tuaa, ma ia faapea ai, “Because of YOU – the Women in our family are who we are today. You are the wind beneath our wings MA.” (Talu ai OE – ua mafua ai ona iai uma Tamaitai o si o tatou aiga i tulaga ua matou iai i aso nei. MA, o oe lava o le savili sa malolosi ai le apatā o o matou apaau.”
O le a manatua pea “Ma” i lona soifua finafinau, sa avea o se a’oa’oga tele mo nisi tina ma tamā matutua, e le avea le matua o le soifua e amata ai ona natia tomai ma ni taleni na faamanuiaina ai oe mai le Atua, ae ia faaali ma faaaaogā a o maua avanoa.
Ma o nei taleni o le faatino o se vaaiga i ata tifaga, e le na o tagata mai ni tupuaga taualoa e faaaaogā iai.
Poo fea lava o Samoa e te tupuga mai ai, ae afai e iai lou tomai ma lou loto e faatino ai se galuega, e mafai lava ona e faataunuu, ma faatino i se tulaga e te ta’uta’ua ai, e pei ona sa iai le soifuaga o “Ma”, poo le afioga ia Leiataua.
E momoli atu ai faamaisega ma moomooga alofa mo le aiga atoa o le tina, le afioga ia Leiataua aemaise alo ma fanau faanoanoa, ona o le tuua o le malo e si o latou tina pele.
