O le a faamavae mai lona tofi faipule le tamaitai o Golriz Ghahraman e pei ona lipotia i le asō ma e faamamalu ai foi lava i le asō lea fuafuaga.
O le aoauli o le asō ua faamatuu mai ai se pepa o faamatalaga mai le vaega faaupufai a le Green, mai ona taitai o James Shaw ma Marama Davidson sa tuuina faatasi ane ai ma se faamatalaga mai ia Ghahraman e faatoese ai i tagata uma e tusa ai o tuuaiga ua faia faasaga ia te ia.
Ua faailoa foi e le Green e lē o fia faia se faamatalaga i le mataupu ona o loo faia suesuega ae ua faamanuia foi i le tamaitai faipule i aluga o le soifuaga.
O le 2017 na avea ai Ghahraman ma faipule ma o loo numera 7 i le lisi a le vaega faaupufai.
Na ia faafetai foi i le avanoa sa avea ai o ia ma faipule ma tagata na lagolagoina o ia ma ia faafetaia foi le pisinisi a le Scoties Boutique i le agalelei faaalia ane ia te ia.
