O le siamupini ai o le Kolisi o Amoa i taaloga lakapi a aoga maualuluga i Samoa, e lē o se vaega na tapena ananafi ma se vaiaso se tasi; e leai.
O le saunoaga lea a le susuga i le alii pule ia Faamoetauloa Sa’u Salaivao Talagafa Itamua.
O le ‘au lenei ua siamupini a le Kolisi o Amoa, o le ‘au lea sa saili siamupini ma le Kolisi o Leififi i le tausaga ua mavae i lalo o le 16 tausaga.
Ma sa lei manuia le taumafaiga i le tausaga ua mavae, ma o lea na saunoa faamalosiau ai le susuga i le alii pule aoga ia Faamoetauloa Sa’u Salaivao i fanau aoga e aua le popole aua foi le faavaivai ae omai e toe tapena le ‘au ma tuli le manu ia maua i lenei tausaga.
O le Kolisi o Amoa e leai sona malae taalo tele e ono fai ai taaloga ma e leai foi ni mea e ono fai ai toleniga a fanau, ae na ta’ua e le susuga e le alii pule, a o tapena taaloga a fanau i lenei tausaga, sa tele ina malaga i Puapua o loo iai malae tetele ma fai ai toleniga, o pa’u taavale na maua atu sa tele ina fulifuli, o maea o vaa sa amo solo faatasi ai ma toleniga i le sami sa saili ai le mānava, ma o auala ia sa saili ai le malosi ma le manava a fanau aoga, faapea nai ata lakapi sa matamata ai fanau e puepue mai ai nisi vaega o le taaloga.
E tolu vaiaso sa fai ai le nofo tumau a le autaalo, ina ia maua le mafutaga faatasi a tama taaalo ma le loto e tasi.
Ae sa tausi lava i meaai soifua maloloina e pei o supo sa ave iai fualaau’aina faatasi ai ma le agalelei ma le alofa tulai o le itumalo na tauaaoina nisi o meaai auā lava le tausiga o le togalauapiga a le autaalo.
E tele vaega na tilotilo iai le susuga i le alii pule ma le aiga faiaoga a o lei masii mai le ‘au a le Kolisi i le sailiga siamupini.
O le itu tau le malosi ma le mafaufau i le faatinoina o le taaloga o le vaega lea sa gafa ma le faiaoga a le ‘au ma le pulega, ae o le itu i le amio pulea i totonu o le malae ma vaega na agai iai le ‘au, o itu ia sa galue ai le susuga i le alii pule ma le pule lua.
Ma o nei vaega uma sa taunuu lava ina ua masii mai le ‘au i Tumua mo le taaloga.
E lē o po se lilo i le mea sa tupu ina ua uma le taaloga, lea sa vevesi ai le autapuai i autafa o le malae, ae to’a malie lava fanau aoga auā sa tasi lava le leo na faalogo iai i lea taimi.
Ua maua le manu sa tuli e le Kolisi o Amoa lea ua sola ai ma le Siamupini o taaloga lakapi a aoga maualuluga i Samoa.
