Ua faasala i le falepuipui mo le 2 tausaga ma masina e 10 se alii talavou ua faamaonia lona faaaogā o le pepa fanau o se isi tagata e fai ai lona tusifolau na malaga ai i galuega faavaitaimi, ae o le tusifolau foi lea na faaaogā e faamaonia ai lona lesitala mo le palota tele ua mae’a a le atunuu.
O le alii o Liu Feliua’i Uaita na tula’i i le vaiaso nei mo se faai’uga a le faamasinoga i se faasalaga lea ua aumai ai se finagalo o le faamasinoga o se faasalaga e faailoa atu ai i se isi tagata o fuafua na te faia lea ituaiga o solitulafono, e lē solomuli le faasalaga talafeagai pe a faamaonia.
O Aperila o le tausaga nei na aga’i ai lē ua faasalaina e lesitala mo le palota na faaaogā ai le tusifolau na faia i le pepa fanau o se isi tagata.
O Iuni na aga’i atu lē e ana tonu le pepa fanau e lesitala mo le palota ae logo loa iai e le ofisa o faigāpalota ua uma ona lesitala.
O i na iloa ai le faaletonu ma tuuina atu loa le matāupu i leoleo mo su’esu’ega, o lea na molia ai loa le taulealea o Liu.
Ua faaalia i le faai’uga na māfua ona faaaogā e lē ua nofosala le pepa fanau o se isi tagata ona ua lē mafai ona alu ese ma Samoa ona sa iai se solitulafono sa aafia ai i le tausaga e 2023, e lē mafai ai ona agavaa e malaga i galuega faavaitaimi.
