Ua toe tolopo le tuuina atu o ni tali a se tamā ma lona atalii i moliaga a leoleo o le umia o le ‘aisa ma laau faasāina se’i faamae’a suesuega a leoleo ma faamautu moliaga faaiu.
Peitai ua faaauau pea ona nofo taofia i le vaaiga a leoleo le tamā o Tupa’i Anthony Moananu, ae ua tatala i tua i ni aiaiga lona atalii o Benjaminponi Junior Tupa’i.
O le tamā ma lona atalii na molia e leoleo i le mae’a o se osofaiga poo se raid a leoleo i Falelauniu i le lata ai nei i le lua vaiaso talu ai.
I le faamasinoga maualuga lava, o alii e toafā na molia foi e leoleo i se osofaiga i Vaimoso na maua ai ‘aisa o laau faasāina o le mariuana, faapea masini computers ma telefoni feaveai, ua toe tolopo foi ni a latou tali i moliaga a leoeo se’i faamae’a lelei suesuega a Malu o le Malo ma faamautu moliaga.
O le tasi o lea toafā ua tatala i tua i ni aiaiga, ae o le isi toatolu o loo nofo taofia pea i le vaaiga a leoleo.
O le osofaiga a leoleo na mafua ona o se suesuega i se solitulafono tau talepe fale na toesea ai ni masini computers mai se faleoloa i Vaimoso, ae o ia masini na maua i le fale o se aiga na faatūtū iai le osofaiga ma maua ai ma aisa ma mariuana.
