Ua una’ia e le malo o Niu Sila tagata ina ia vave ona faafou o latou tusifolau pe afai ua mae’a le aogā a o le’i oo atu i le tausaga fou lea e lē taumate o le a maualuga ai le aofa’i o tagata e fia talosaga mo tusifolau Niu Sila.
O le minisita o matāupu faalotoifale a le atunuu o Brooke Van Velden na ia faailoa, o lea ua lata ina maea le ta’i 10 tausaga o isi tusifolau sa talosagaina talu ai, ma e silia i le 1.3 miliona tagata Niu Sila o le a lata ina uma le aogā o tusifolau pe a atoa le ta’i 10 tausaga.
Ta’ua e le minisita o lea ua faaitiitia mai e le malo le taimi e faatali ai le faafouina o tusifolau, mai le 25 aso sa masani ona iai i le na o le tolu aso ma e faigofie foi le faaaogā o le online poo auaunaga a le immigration i luga o upega tafa’ilagi e faatino ai lea tulaga.
O le isi faamanatu mai le minisita, a mana’o vave i le tusifolau, aua le faaaogāina ata e pu’e e le tagata lava ia, ae pu’e lelei se ata talafeagai, se passport photo e vave ai foi ona maua nai lo le toe faafoi mai o oe e toe fai atu se isi ata talafeagai.
Puna o Faamatalaga: https://www.rnz.co.nz/news/political/581816/government-urging-passport-renewals-as-more-than-1-point-3-million-set-to-expire-over-two-years
