Ua sainia nei e faipule o Niu Kaletonia ma le Peresetene o Farani o Emmanuel Macron se maliega faapolokiki ma tulaga tau tupe e faatatau i lo latou teritori lea o Niu Kaletonia.
Faailoa e le RNZ o le maliega ua faaigoa Elysee Oudinot Accord na saini uma ai le to’atele o ta’ita’i o le atunuu peita’i e lē o auai ai foi le vaega a le FLNKS.
I le mae’a o feutana’iga na faia i aso e fā e faatatau i le maliega lea, ua faataunuu ai loa ma lona sainiga ma e mātele lava ina faavae mai i luga o le maliega na iai talu ai i le masina o Iulai 2025, e faafetaia ai e Macron le atunuu i lo latou sao ma le lototele i le faia o nei maliega.
Ua faailoa foi i le lipoti o loo aofia i le maliega lea se vaegatupe e 2.2 piliona ua fuafua e tuu ane mai Farani i Niu Kaletonia i totonu o le isi lima tausaga.
O le isi sitepu e sosoo ai o le tuu atu loa o le maliega lea i le Palemene a Farani ma faia foi le palota lautele i Niu Kaletonia e fesiligia ai finagalo o le atunuu i aiaiga o lea maliega.
Puna o Faamatalaga: https://www.rnz.co.nz/international/pacific-news/584502/another-new-caledonia-agreement-signed-in-paria
