E to’a limasefulu tagata faigaluega o le fale gaosi avamalosi o le Vailima i Vaitele ua motusia tupe maua mai faamanuiaga i totogi ona ua faamuta le latou tautua, i se faai’uga a le pulega o le kamupani e lē toe gaosia i Samoa le beer o le Vailima, ae o le a faasee atu i Fiti.
O lea faai’uga o le a faaaogā ai fale ma isi meatotino a le kamupani o loo i Vaitele e faatau atu ai i le atunuu lea oloa o le a la’u mai Fiti pe a mae’a ona gaosi. I se pepa o faamatalaga mai le pulega o le kamupani gaosi avamalosi i le atunuu ua faailoa ai o se faai’uga sa faigata ona taunuu iai, peitai o le mae’a o se sailiiliga i ni auala e faaitiitia ai tulaga ma’ale’ale tau tupe ua feagai ma le kamupani ma le faaauau pea ona gaosi i Samoa le beer o le Vailima, na faia ai loa le faai’uga e sili loa ona siitia galuega uma i Fiti i le nofoaga o loo faatino ai nisi o galuega tau i le gaosia o le avamalosi a le kamupani ua pulea nei lea meatotino sa umia e le Malo o Samoa i le tausaga e 1978 na mae’a fausia ma amata ai le gaosiga o le beer o le Vailima.
Ua faatau ese sea poo shares o le Malo o Samoa mai lea kamupani ma ua muta ai ma le toe iai o se leo o le Malo i le pulea o lea aseta sa tafe mai ai nisi o tupe i le faagaioia o le tamaoaiga o le atunuu i tausaga ua tuanai.
