O loo aumai pea fautuaga ma lapataiga i le mamalu o le atunuu aemaise lava foi ia i latou i le motu i Matu o Niu Sila poo Aukilani nei, ina ia faaaoga tatau aso nei ma taimi a o to’a mai pea le tau, ina ia tapena uma ma sauniuni aiga mo le tulai mai o ni tulaga e suia faafuasei ai le tau pe afai e oo ona aafia nei vaega o Niu Sila i le afā o loo faailoa mai aemaise foi nisi aafiaga mai le loulouā o tulaga o le tau.

I se feiloaiga a le autusitala ma le Auckland Emergency Management’s Deputy Controller, o Rachel Kelleher faapea le pulenuu o Aukilani, Wayne Brown, na sau ai nisi o lapataiga aemaise lava mo le faamautinoaina o le saogalemu o tagata uma.

Na saunoa Kelleher, ‘Ua tatau ona faaaogā lelei aso nei o loo to’a mai ai le tau, e faamautinoa e aiga uma ma soo se tagata, ua lava le sapalai o meataumafa a le aiga e tausia ai i latou mo aso e tolu pe sili atu, ia lava le suavai inu ma isi mea uma e tatau ona faatulaga mo le aiga pe a tulai mai se manaoga.

E faatalitalia e tusa ai o lipoti mai le vaega o vaaitau, e ono tetele timuga, matagi malolosi, ma ono tulai mai foi ni lologa i nisi vaega o le atunuu, pe iu foi ina solo ai ni palapala. E tāua ai lava le mataala ina ia vave ona gaioi e faatino le auala e sao ese ai, ma ia fai pea ma faalogologo pe faitau i faasilasilaga a le vaega o le vaai tau mo ni lipoti pito lata mai o suiga eseese o le tau.

O le augani mai a le alii pulenuu mo tagata uma o Aukilani ina ia alolofa e nofo mataaalia ma galulue faatasi e fesoasoani i ni auala e maua ai le puipuiga.

O le afā o Gabrielle o loo faatalitalia e ono faapogaia ai le maualuluga o ni galu o le sami ma oo atu lava ina matuā malolosi le agi o savili.