E le tatau i le Pasefika ona nofoa’i ma na o le vaavaai ae le tutu malosi ma suesue atili i le maliega ua ta’ua o le AUKUS.
O le maliega lenei na faasilasila aloaia mai e taitai o Amerika, Peretania ma Ausetalia o le a faia ai vaamaulu faaniukilia ua faaupuina e mo le puipuiga o le va o atunuu nei e tolu o loo i totonu o lenei li’o ae faapea le Pasefika atoa.
O le AUKUS na muai sainia i le 2021 ina ia tutu malosi ai e tetee atu ia Saina ma lona taumafai malosi.
E le o iai Niu Sila i totonu o le AUKUS, ma na saunoa le Palemia Chris Hipkins e le taliaina e Niu Sila vaamaulu nei i ona ogasami.
Ae mai ia Saina, o le faia o vaamaulu faaniukilia nei a le AUKUS ua o ni mafaufaga e tau ma leai ai ma se nofo filemu.
Ae tuu mai i le Pasefika, o lea ua mae’a feiloai le Palemia o Ausetalia Anthony Albanese ma le Palemia o Fiti Sitiveni Rabuka, ma o loo lagolagoina e Rabuka le AUKUS.
Ae fai mai lē sa avea ma failautusi o le Pacific Islands Forum, Dame Meg Taylor e tatau i le Pasefika ona matuai vaavaai iai ma le toto’a.
A o Matthew Fitzpatrick i tala a le leitio a Niu Sila, e i luga uma o Ausetalia le maliega ua faia nei aemaise o le tala a Ausetalia ua fai mai nei i atunuu o loo iai faatasi i totonu o le Treaty of Rarotonga, poo le maliega e faasā ai faiga faaniukilia e le o solia e le AUKUS lea maliega.
O le Treaty of Rarotonga, o loo iai i totonu le 13 atunuu o le Pasefika e aofia ai ma Samoa.
