E lē o tele se fesoasoani mo faalapotopotoga nei e ta’ua o food rescue charities ma ua valaau mai ai mo se fesoasoani.
O le aso ananafi na maua ai le avanoa o sui o faalapotopotoga nei e fono ma sui faipule ma faaleo iai itu o loo popole ai e le gata o le tele o meaai ma’umau, ua tatau ona faamalosia se system e faamaumau ma lipotia ai le faatauga o meaai ae faapea ai ua moomia se isi fesoasoani tupe e faatupe ai le auaunaga.
Na molimau le Fair Food food rescue i Sisifo o Aukilani, o aso uma e taunuu atu ai le loli 2 tone o meaai mai supamaketi ma le aufaifaatoaga, ma o meaai foi nei o loo toe faasoa atu i isi charities eseese e 50 latou te toe faasoaina atu i tua i le komiuniti.
O se aofaiga e tusa ma le 2 miliona meaai i totonu o le tausaga e tasi.
E ui i lea, e le o mafai ai lava ona faafeiloaia le tele o le manao mai tagata ma ua moomia ai e faalapotopotoga nei le $12 miliona e faaauau ai pea ona galulue.
O le paketi a le malo o le tausaga nei na sau ai ua faaitiitia fesoasoani tupe mo faalapotoptoga o loo i lalo o le food support sector.
