Ua molia nei e leoleo se tamā matua e 79 tausaga e suafa ia Sinve Vulic i le falavelave na fanaina ai se tasi foi tamā matua e 77 tausaga o se loia e suafa ia Van Cooney i le vaiaso nei i Sini.
Fai mai le 7News sa iai le loia i lona ofisa i le city ae agai atu iai le tamā penisiona lea ma fana ai le loia.
Na tamomo’e ane iai tagata faigaluega ma taofi le tamā matua lea seia oo ina taunuu atu leoleo.
O le asō na tulai ai le loia a Vulic i le faamasinoga ma talosagaina ai le faia o ni siaki tau le soifua maloloina o lana client lea o loo taofia pea e leoleo ma ua toe faatulaga le mataupu i le faamasinoga i le aso 2 o Me.
E lē o iloa poo le ā tonu le sootaga o tamā matutua nei e toalua.
Sa auina atu le loia i le falemai mo togafitiga ae ua feagai nei le isi tamā matua ma moliaga o le fana ma le faamoemoe e fasioti, moliaga i le tagofia ma le umia o se auupega e aunoa ma se faatagana.
