Tusia: Maina Vai
Ua faamaonia mai e le Komesina Lagolago ia Auapaau Logoitino Filipo le molia ai e leoleo o se alii 51 tausaga mai Tafatafa Falealili ma Sinamoga i le fasioti tagata ma le faaoo manuaga tūgā.
O lea faalavelave na tulai mai i Tafatafa Falealii lava i le aso ananafi. O le ua maliu e toatolu iai latou na aafia i le faalavelave ma o loo tigaina le isi toalua i le potu tigaina (ICU) i le falemai i Motootua. Na faailoa e Auapaau o se inugaava a le toaono e aofia ai le toatolu ua aafia na amata mai lava i le Aso Toanai seia oo mai i le aoauli ananafi.
O i latou ia na faasuāāvā ma agai mai loa ua malomaloā i lumafale o se aiga i Tafatafa lea e mafua a ai le vevesi ina ua tauai i maa la latou taavale. Na sosola ese le toalua mai le taavale ae o le toatolu o le toafā na totoe, na lalafo upu masoā ma vevesi ai loa ma le ua molia.
Na faailoa e le Komesina Lagolago sa tauai i ma’a e le toatolu lea lē ua molia…agai loa lē ua molia i lona aiga ma fo’i ane ai ma le agaese ma faao’o ai loa manuaga tuga i le ua o lē ua maliu. E tūga foi’i manuaga o i laua o taofia nei i le falema’i i le tua o le isi ao le tauau o le isi. O loo taofia nei e leoleo e faatali ai le taimi e tulai ai i luma o le Faamasinoga.
