I se faai’uga a le laulau o faatonu poo panel of assessors e le’i faamaonia ai tuua’iga o le fasioti tagata faamoemoeina mo alii e to’afā mai Sapulu Faleasiu peitai sa tuuina mai se faai’uga autasi a le laulau ina ia molia ma tuua’ia i latou nei i le fasioti tagata pa’ivalea.
O Puka Wesley, Faasipa Matuu, Milo Lilomaiava ma Peato Upu na molia faatasi i le maliu ai o se alii o lea lava afioaga ia Pei Aumalii i se taua’iga maa na tula’i mai i le masina o Fepuari 2018.
Na tuu atu uma tali tetee a i latou e to’afā i luma o le faamasinoga ma e ui o loo molia faatasi e eseese loia o loo tulai mo i latou ia. O le afioga ia Fuimaono Sarona Ponifasio o le loia a Peato Upu, o le afioga Unasa Iuni Sapolu o loo tula’i mo Milo Lilomaiava. O Ann Matalasi o le Leavai Law na tulai mo Faasipa Tupu ma Tanya Toailoa o loo tula’i mo Kupa Wesley.
I lipoti a le Samoa Global News e 18 molimau na lisiina mo lea mataupu i le vaiaso atoa i luma o le tamaitai faamasino Tafaoimalo Leilani Tuala-Warren ma i ia molimau na faailoa ai e le foma’i faapitoa na malaga mai Ausetalia e faatautaia le ta’otoga na ia ta’ua ai o le alii o Pei Aumalii na maliu mai i ni manu’aga tugā i lona fatafata ma lona ulu.
O loo tatala i tua i latou nei e to’afā ma o le masina fou o le a lau ai o latou i’uga i luma o le faamasinoga.
