O le tina o tamaiti e to’atolu lea na maua atu ua maliliu i totonu o se fale na mu i Western Australia i le faaitu o Pilbara ua faailoa mai nei ua molia i le fasiotia o nai ia tamaiti.
O tino maliliu o le teineititi 10 tausaga, tamaititi e 7 tausaga ma le pepe tama e lima masina na maua i le fale lea i Anderson St i le Aso Lua talu ai ma amata faia mai ai su’esu’ega.
Peitai la o le lipoti lata mai o le faalavelave lea ua faailoa mai ai o Margaret Hawke 36 tausaga o le tina foi lea o tamaiti, ua molia nei i moliaga e tolu o le fasioti tagata ma le isi moliaga e tasi e faatatau i le faaleagaina o meatotino.
O le asō e tatau ona tulai ai i le faamasinoga i Perth ae ua lipotia sa tuuina foi le fesoasoani o lagolago tau i gasegase tau le mafaufau mo i latou na muamua oo atu i lea nofoaga mo le faia o galuega laveai, first responders ona o tulaga o faalavelave faapea sa vaaitino iai.
