34 tausaga le matua o le tamā ua molia i moliaga o le faaoomanu’a e matuai afaina ai le tino o le isi ma e fesootai ma le pepe tolu masina o loo tigaina i le falema’i.
O le Aso Tofi na faaoo ane ai lipoti i leoleo mai le fale o se tasi o aiga i Masterton ma ina ua oo atu na maua ai le pepe tolu masina ma manu’aga tugā, ma o nei manu’a e lē faapea na mafua ona o se mea na tupu faafuase’i.
Na faatopetope atu ai i le falema’i i Masterton mulimuli ai faaauau atu i le falema’i o tamaiti a le Starship i Aukilani.
O loo faaauau pea su’esu’ega a leoleo ma le tala e lē faigofie i tagata aafia le mea na tupu, ma o loo faia pea nei faatalanoaga.
O le asō e tulai ai le tamā ua molia I luma o le faamasinoga faaitumalo i Masterton.
