Ua faamaonia ua molia le tagata lea na faaoolima i se tagata faigaluega o le Centrelink i le taulaga faatau i Melepone i le aoauli ananafi.
Fai mai le 9News e 55 tausaga o le tagata faigaluega o le Centrelink na faavave atu i le falemai i se tulaga tigaina ina ua tui se’i tulou e le tagata lea a o iai i se vaega o le taulaga faatau i Airport West poo le ‘afa o le tasi i le aoauli.
Na maua e leoleo le tagata na faatinoina lea gaioiga i se nofoaga lata ane e pei ona faailoa mai i se pepa o faamatalaga.
E 34 tausaga le matua o lea alii mai Essendon ma ua faia iai moliaga e tusa o le faalavelave.
O le tagata faigaluega na aafia o se tamaitai ma ua faailoa mai o loo faasolo manuia i le taimi nei.
O loo faia suesuega ma o le afiafi ananafi na tulai ai lē ua molia i le faamasinoga ma o loo tālia se isi faamatalaga lata mai a leoleo e tusa o lenei faalavelave.
