Ua faamaonia i lipoti i le asō ua molia le avetaavale o se tagata matua lea na aafia ai se tina ma sana tama i le kapaka o le supamaketi i le West Coast i le masina talu ai. 

O Chelsea Ferguson na lavea i le taavale a o savavali ane ma si ana fanau e toafa agai i le kapaka a le New World i Westport i le aso 15 o Novema ma o le asō ua faamaonia mai ai e leoleo ua o latou molia le tamā e 86 tausaga i le ave taavale faatamala ua mafua ai manuaga.

Na faia taotoga o si tina lea i ona manuaga ae tupu le faalavelave faatoa taunuu atu mai Ausetalia e asia si ona aiga i Westport.

Fai mai lipoti sa taumafai si tina e pupuni si ana fanau mai le taavale ma o i na aafia ai faatasi ai ma si ana tama teine. O se itulau i le Givealittle ua mafai ona aoina ai se vaegatupe ua oo atu i le 47 afe mo si tina sia ma si ona aiga a o taofia ai pea i le falemai i Kalaiesetete mo ona togafitiga.

O le tamā matua ua molia faatoa tulai i le faamasinoga i le masina o Ianuari.