E 14 tausaga o le teine talavou ua molia nei e leoleo i le faalavelave na osofaia ai se isi teineititi 12 tausaga i se faleaiga o le McDonalds i le faaiuga o le vaiaso.
Fai mai lipoti o le aoauli o le Aso Toonai na tea nei a o aai ai le 12 tausaga lea ma ana uo i le McDonalds i Glenfield ma ua faailoa e lona aiga i le lipoti, sa talie lava le teineititi ma ana uo ae foliga ua talitonu ai le 14 tausaga lea o loo taufaalili atu ia te ia.
Fai mai o fafo mai o le faleaiga na faatonu ai e le 14 tausaga le 12 tausaga e faatoese ane ma ua feta’ua’ina sa ia faaoolima ai loa i loa iai, ma e faapea le lipoti sa afaina foliga o le teineititi 12 tausaga.
O le asō ua faailoa e le One News e tatau ona tulai ai le 14 tausaga lea i le faamasinoga faaitumalo i North Shore.
Fai mai leoleo e le toe tele foi sa latou tala i le mataupu ona ua i luma nei o le faamasinoga.
Pau isi faamatalaga o loo ta’ua mai i le lipoti o le teineititi ua aafia faatoa malaga mai ma lona aiga i Niu Sila ia Aokuso o le tausaga talu ai mai le Atu Filipino.
Sa faia se faamatalaga a le Palemia i luga o le Breakfast i le taeao analeila ma ia ta’ua ai le lē taliaina o ia ituaiga tulaga ma le osofaiga na faia ma e lē tatau ona iai soo se tasi e oo i ia tulaga faapea.
