O Uiatu ‘Joan’ Taufua, o le tina lea o le alii Samoa lakapi liki ta’uta’ua a le Broncos, o Payne Haas, ua molia nei i le fasioti tagata paivalea mai se faalavelave tau taavale matautia ua maliliu ai ni tagata se toatolu i le Aso Faraile, 30 o Tesema na mavae atu nei.

I nisi o vaega o le lipoti o loo ta’ua i le Brisbane Times, e 46 tausaga le matua o le tina ua molia nei i moliaga e tolu e pei ona maua mai leoleo, o le fasioti tagata pa’ivalea (manslaughter), o le aveina i se tulaga matautia se taavale, ma le taumafai e sola ese mai leoleo ma aveina le taavale ae o loo se’i le laisene.

O ni molimau na latou vaaia le matautia o le saoasaoa ma le lamatia o le tulaga na aveina ai le taavale a lenei tina a o lei fetoai lana Mercedes uliuli ma le Mercedes lanu siliva sa iai i totonu si tamā o Chris Fawcett e 79 tausaga o le soifua, o Susan Zimmer e 70 tausaga o le soifua, ma lana tama teine o Steffanie Zimmer e 35 tausaga o le soifua, ma o i latou uma nei na maliliu ai lava i le nofoaga na tupu ai le faalavelave.

E foliga mai e sese le itu o le auala na alu ai le taavale a Taufua ma i se saoasaoa matuā matautia ma ia soso’a atu ai le taavale a si aiga lea ma mafua ai ona fetoai le taavale a le aiga ma se pou molī i le itu o le Bonogin Road i Gold Coast.

Sa leoina e malu o le malo le tina ia Uiatu a o iai i le falemai i ni ona manu’anu’a ogaoga mai le faalavelave, ae o le aoauli o le Aso Gafua na tulai ai mo ia lana loia o Leah Johnson mo le valaauga puupuu o le moliaga lenei i luma o le faamasinoga ma ua tolopo atu ai nei seia aulia le aso 11 o Ianuari.

O se tala faanoanoa mo lenei alo o Samoa i le tulai mai o lenei faalavelave ua aafia ai lona tina, o le a avea ma foi ma ila i lona taumafai i ana taaloga, a o amata ai foi ona faaali lagona tiga o aiga ma uo a i latou ua ma’umau soifua i lenei faalavelave matautia.

O le fautuaga ma le faamanatu ma loimata a si teine e onaina matua ma le uso ua maliliu i lenei faalavelave, ina ia tautuana ma i latou e aveina taavale i soo se taimi, ia manatua o soifua uma ma ola o tagata o loo i totonu o lau taavale ma isi foi taavale o loo tou malaga faatasi, ua e uuina uma i ou aao; e manaomia le ave o le taavale ma le faautauta.

Mo si ona alo, le alii lakapi o Payne Haas, ua lipotia mai le toesea ai mai toleniga a lana ‘au mo sina taimi a o agai atu e faatasi ma lona aiga i nei taimi faigata.

O le a toe iai nisi lipoti atu o lenei mataupu i se taimi o i luma.