Ua teena e le taitai o le vaega faaupufai o le Faatuatua i le Atua Samoa ua tasi, faapea le taitaifono o lea pati, ma le failautusi o le faafaletui, moliaga solitulafono o le faia o gaioiga faaalatua poo le bribery, e mafua i le faalauiloa a le vaega faaupufai sa faatino a o loma le palota laititi a Vaimauga 3.
O moliaga nei ua faaulu i le faamasinoga faaitumalo, e se tasi o sui lagolago o le vaega e puipuia aiātatau a tagata o Theresa Coffin, o se tasi o molimau na lagolagoina le tagi tau palota na faaulu e le sui tauva o le HRPP le afioga Samau Leatigagaeono Solitamalii Samau.
E ese mai le mataupu lenei i le tagi ua mae’a faia iai le faaiuga a le faamasinoga o palota na fofogaina i le Aso Faraile na tea nei.
O moliaga a Theresa Coffin o loo tuuaia ai le afioga Fiame Naomi Mataafa, Laauli Leuatea Polataivao Fosi Schmidt, ma Vaaaoao Alofipo i le limaafe tala na tuuina atu e le Faatuatua i le Atua Samoa ua Tasi, i le afioaga o Magiagi i le faalauiloa o le palota laititi na faia i le masina o Fepuari.
Ua tuuina atu tali tetee a sui o le Faatuatua i le Atua Samoa ua Tasi i le moliaga, ma ua faatulaga ai o le a valaauina molimau i le aso 23, 24 ma le 25 o le masina o Aokuso.
O se tagi foi o moliaga solitulafono o faiga faaalatua ua faaulu e le failautusi o le Faatuatua i le Atua Samoa ua Tasi faasaga i le faipule o Faleata 3 le tofa Lealailepule Rimoni Aiafi, ua faatulaga e suesueina molimau i le masina o Iulai.
O mataupu nei o tuuaiga solitulafono poo criminal charges e ese foi ala o le tulafono e tagofia ai e ese mai le faamasinoga o tagi tau palota sa suesueina ai lea ua aumai le faaiuga a lea faamasinoga ua le faamaonia moliaga.
E manino mai i nei mataupu tau faamasinoga o le taamilosaga lona lua lea o tagi e aafia ai gaioiga solitulafono i le taimi o loo loma le palota laititi a Vaimauga 3.
